«Бу осон ўйин бўлмайди». Каннаваро Португалияга қарши бўлажак учрашув ҳақида фикр билдирди

Ўзбекистон терма жамоаси бош мураббийи учрашувга кўрилган тайёргарлик ҳақида гапириб берди ва Португалиянинг футбол фалсафаси ҳақидаги фикрлари билан ўртоқлашди

Футбол бўйича Ўзбекистон терма жамоаси бош мураббийи Фабио Каннаваро ва миллий жамоа сардори Элдор Шомуродов Португалияга қарши учрашув олдидан матбуот анжуманида иштирок этишди.

Албатта, бизда босим йўқ. Шу сабабли эртага Португалияга қараганда бизга осонроқ бўлади, деб ўйлайман. Бизда ажойиб жамоа шаклланган. Биринчи ўйиндан кейин бизда ишонч шаклланган, биз аллақачон дебют қилиб бўлдик. Биз эртага яхши натижа учун майдонга чиқамиз, — деди Шомуродов.

Каннаваро Португалия жаҳон чемпионатининг энг кучли жамоаларидан бири эканлигини таъкидлади.

Рақибимиз Жаҳон чемпионатидаги энг кучли жамоалардан бири ҳисобланади. Агар Португалия жамоасини таҳлил қилиб кўрсангиз, уларнинг қанотларда жуда кучли футболчилари бор, дунёнинг энг яхши ярим ҳимоя чизиқларидан бирига эга, шунингдек футбол тарихидаги энг яхши футболчиларидан бири ҳам шу жамоада ўйнайди.

 

Шундай экан, бу осон ўйин бўлмайди. Лекин биз Жаҳон чемпионатидамиз, жамоа сифатида ҳаракат ва меҳнат қилишимиз зарур. Чунки ижобий натижа билан майдонни тарк этишнинг ягона йўли шу, — деди Каннаваро.

Элдор Шомуродов жамоа Португалияга қарши учрашувга бор эътиборини қаратганини таъкидлади.

Биз рақибимизнинг биринчи турдаги ўйинининг натижасига аҳамият бермадик. Бу ҳақида ҳозир ўйлашнинг пайти эмас. Балки учинчи турдан кейин буни муҳокама қилармиз, ҳозир биз учун энг асосийси эртанги баҳс, — деди Шомуродов.

Фабио Каннаваро жамоа Португалиянинг футбол фалсафасини ўрганишга ҳаракат қилганини таъкидлади.

Биз Португалиянинг футбол фалсафасини ўрганишга ҳаракат қилдик. Улар доимо тўп назорати орқали ўйинни бошқаришни ёқтиради. Шунингдек, учрашувни жуда фаол бошлашга интилишларини ҳам биламиз. Чунки имкон қадар тезроқ ўйинни ўз фойдасига буришни, ҳимояни ёриб ўтишни исташади.

 

Шундан келиб чиқиб биз ҳам бунга тайёргарлик кўрдик, деб ўйлайман. Ўз режамиз ва стратегиямиз бор ва майдонда айнан ўз ўйинимизни намойиш этишга ҳаракат қиламиз. Футбол шундай ўйин. Биз жуда кучли жамоага қарши майдонга тушаётганимизни биламиз, аммо аввал ҳам айтганимдек, биз бундан қўрқмаймиз. Қўлимиздан келган энг яхши ўйинни кўрсатишга ва учрашув охиригача курашишга ҳаракат қиламиз, — деди мураббий.