Ҳиндистонда ўсмир телефондаги ўйин сабаб поезд остида қолди
Ҳиндистонда 11-синф ўқувчиси онлайн ўйиндаги топшириқни бажараман деб поезд остига тушиб кетди. Бу ҳақда «News9Live» хабар бермоқда.
Бҳопал шаҳрида яшаган Мритюнжай Шарма кўп вақтини телефондаги машҳур ўйинга сарфларди. Бу ўйин шартларига кўра, реал ҳаётда турли вазифаларни бажариш керак бўлади. Кунларнинг бирида ўсмирнинг жасади уйи яқинидаги темирйўл изларидан топилган. Марҳумнинг яқинлари, у ўша ўйиндаги топшириқни бажариш учун темирйўлга борган бўлиши мумкинлигини айтмоқда.
Фожиа юз берган куни ўсмирнинг оиласи диний тадбирда бўлган, шу сабабли унинг ниятини ҳеч ким билмаган. Полиция ҳодиса бўйича тергов ишларини бошлади.
Ҳиндистонда ушбу ўйин сабаб биринчи марта фожиа юз бераётгани йўқ. 2024 йилда 17 ёшли йигит учинчи қаватдан сакраб, ҳалок бўлганди. Ҳодисадан бир кун олдин у онасидан шундай баландликдан йиқилса, нима бўлиши ҳақида сўраган. Ўсмирнинг оила аъзолари ҳам ўғли ўйинда хавфли топшириқ олиб, шундай қилганига ишонади.
