Эронда тўрт нафар аёл президентликка номзодини қўйди
Эрондаги президентлик сайловларида иштирок этиш учун тўрт нафар аёл ҳужжат топширди, деб хабар бермоқда IRNA.
Номзодлар орасида Зухра Илохиян, Хаджар Ченарани, Хамида Зарабади ва Рафат Байят бор. Уларнинг барчаси мамлакат парламентининг собиқ депутатларидир.
Зухра Илохиян (56 ёш) – Эрон Тиббиёт фанлари академиясида шифокор бўлиб иш юритади.
Ҳамида Зарабади (45 ёш) – ташқи сиёсатдаги кескинликни пасайтириш тарафдори эканини айтиб, эронликлар бир кун келиб аёл президентни сайлашига умид билдирди.
Хаджар Ченарани (45 ёш) – бунгача парламент депутати ҳамда Миллий хавфсизлик ва ташқи сиёсат бўйича парламент комиссиясида ишлаган. У депутатлик фаолияти давомида мажбурий ҳижоб бўйича қатъий қоидаларни илгари сурган.
Рафат Байят (66 ёш) – социолог сифатида ишлайди. У 2005 ва 2009 йилларда президентликка номзод сифатида рўйхатга олинган, бироқ унинг номзоди Конституцияни ҳимоя қилиш кенгаши томонидан маъқулланмаган. Шу кунгача Эронда бирорта аёл номзодларнинг якуний рўйхатига киритилмаган.
Энди Конституцияни ҳимоя қилиш кенгаши етти кун ичида номзодларнинг малакасини кўриб чиқиб, якуний рўйхатни 11 июнь куни эълон қилади. Маълумот учун Эронда муддатидан олдин сайловлар 28 июнь куни бўлиб ўтади.
