Ўзбек миллий қўғирчоқ театри реконструкциянинг биринчи босқичидан сўнг ўз фаолиятини қайта тиклади
Президент Администрацияси раҳбари Саида Мирзиёева оиласи билан бирга театрга ташриф буюрди
Тошкентда Ўзбек миллий қўғирчоқ театри реконструкциянинг биринчи босқичи якунланганидан сўнг қайта очилди.
Президент Администрацияси раҳбари Саида Мирзиёева оиласи билан бирга театрга ташриф буюрди ва немис ёзувчиси Вильгельм Гауф эртаги асосида саҳналаштирилган «Халифа Лайлак» спектаклини томоша қилди.
Реконструкциянинг биринчи босқичи якунланиши билан театр ҳаёти яна жонланди. Бу ерда спектакллар намойиш этиляпти, болаларнинг қувноқ овозлари янграяпти, ота-оналар фарзандлари билан жам бўляпти. Ушбу масканнинг тарихий қиёфаси, ўзига хос руҳи авайлаб сақлаб қолинган: «Эртаклар шаҳарчаси», залнинг чўян эшиклари, карнай чалаётган созандалар сиймоси, ноёб шиша плафонлар, пештоқ композициялари ва мозаикалар қайта тикланди, — деди Мирзиёева.
Саида Мирзиёеванинг сўзларига кўра, қўғирчоқ театри санъати анъаналарини асраб қолиш учун алоҳида аҳамиятга эга. Жумладан, қўғирчоқ болалар билан мулоқотда ҳамиша энг яхши воситачи бўлиб қолиши ва улар тушунадиган тилда эркинлик, масъулият, матонат, дўстлик каби муҳим тушунчалар ҳақида сўзлашишга ёрдам бериши таъкидланди.
