Айрим ёғ маҳсулотларини Ўзбекистондан ташқарига олиб чиқиш бўйича чекловлар бекор қилинади
«Мойли уруғларни қайта ишловчи корхоналарнинг экспорт салоҳиятини ошириш чора-тадбирлари тўғрисида»ги ҳукумат қарори лойиҳаси эълон қилинди.
Хўжалик юритувчи субъектларга уларнинг ташкилий-ҳуқуқий шаклидан қатъий назар, ўзлари импорт қилган кунгабоқар уруғи ва техник чигитни қайта ишлаш орқали ишлаб чиқарилган ўсимлик ёғини ёки ўзлари импорт қилган ўсимлик ёғини Ўзбекистон божхона ҳудудидан ташқарига олиб чиқиш (экспорт қилиш)га рухсат берилади.
Бунда, хўжалик юритувчи субъектлар томонидан экспорт қилинадиган ўсимлик ёғи миқдори улар томонидан импорт қилинган кунгабоқар уруғи ва техник чигит миқдорининг 15 фоизидан ёки импорт қилинган ўсимлик ёғи миқдорининг 50 фоизидан ортиқ бўлиши мумкин эмас.
Кунгабоқар ва пахта ёғи (ТИФ ТН коди 1512) ҳамда аралаш ёғлар (ТИФ ТН коди 1517909100)дан ташқари бошқа ўсимлик ва мева уруғлари ёғларини Ўзбекистон божхона ҳудудидан ташқарига олиб чиқиш (экспорт қилиш) бўйича чекловлар бекор қилинади.
Белгилаб қўйилишича, қарорга асосан экспорт қилиш мумкин бўлган ўсимлик ёғи ҳажмини аниқлашда хўжалик юритувчи субъекти томонидан 2023 йил 1 сентябрдан бошлаб импорт қилинган мойли уруғ ёки ўсимлик ёғи ҳажмлари инобатга олинади.
Иқтисодиёт ва молия вазирлиги Инвестициялар, саноат ва савдо вазирлиги, Савдо-саноат палатаси билан биргаликда зарур ҳолларда озиқ-овқат хавфсизлиги, мамлакат аҳолисининг асосий турдаги озиқ-овқат маҳсулотлари билан таъминланганлик даражаси ҳамда ички бозорда нарх барқарорлигидан келиб чиқиб, ўсимлик ёғи экспорти механизмларини такомиллаштириш юзасидан Вазирлар Маҳкамасига таклифлар киритиб боради.
