Абитуриентларга тест синовлари учун рухсатномалар берилиши бошланди
2025-2026 ўқув йилида олий ва профессионал таълим муассасаларига кириш имтиҳонларида иштирок этувчи абитуриентларга «Абитуриент рухсатномаси» бериш жараёни бошланди. Бу ҳақда Билим ва малакаларни баҳолаш агентлиги маълум қилди.
Рухсатномани абитуриентлар my.uzbmb.uz сайтига шахсий идентификация рақами ҳамда паспорт серияси ва рақамини киритган ҳолда ёки my.uzbmb.uz/allow/bachelor-allow саҳифаси орқали ЖШШИР ҳамда паспорт маълумотларини киритиб юклаб олишлари мумкин.
Агентлик тест синовида қатнашувчи абитуриентлардан паспорт (ID-карта) ва абитуриент рухсатномаси билан белгиланган вақтдан кечикмасдан келишларини сўради. Паспорт нусхаси ёки бошқа ҳужжатлар билан келган, шунингдек, белгиланган вақтдан кечикиб келган абитуриентлар тест синовларига қўйилмайди.
Эслатиб ўтамиз, абитуриентларни олий таълим муассасалари бакалавриат таълим йўналишлари ва профессионал таълим муассасаларига онлайн рўйхатга олиш 25 июнь куни якунланган эди. Жорий йил учун бакалавриатга ҳужжат топширган абитуриентлар сони 732 411 нафарга етган бўлиб, бу сўнгги етти йилдаги энг паст кўрсаткич ҳисобланади.