Сербияда ҳукуматга қарши норозилик намойиши бўлиб ўтди

Сербияда президент Александр Вучич ҳукуматига қарши йирик намойишлар бўлиб ўтди. Белградда 325 мингга яқин одам йиғилиб, ҳукуматдан коррупцияга қарши чора кўриш ва раҳбариятни алмаштиришни талаб қилди.

Намойишлар 2024 йил ноябрида Нови-Садда темир йўл станцияси томи қулаб, 15 киши ҳалок бўлгани сабаб бошланган. Норозилар фожиага коррупция ва хавфсизлик қоидаларига амал қилинмагани сабаб бўлганини айтмоқда. Шу воқеадан сўнг Сербия қурилиш вазири Горан Весич истеъфога чиққан ва вокзални таъмирлаш билан боғлиқ 12 киши ҳибсга олинган.

Намойишчилар Вучични коррупция, сўз эркинлигини чеклаш ва сайловларда манипуляция қилишда айбламоқда. Намойишлар вақтида бир автомобиль одамларни босиб кетиб, уч киши жароҳатланган.

Иштирокчилар «Коррупция ўлдиради!» шиори остида чиқиш қилган. Президент Вучич эса намойишларнинг асосий қисми тинч ўтганини айтди. Шунингдек, олти киши ҳибсга олинган.

Намойишлар пайтидаги тўқнашувлар натижасида 56 киши касалхонага ётқизилган, 22 киши қўлга олинган.