Европа Иттифоқи Сурияга қарши санкцияларни юмшатди

Европа Иттифоқи Кенгаши Башар Асад режими қулагандан кейин Сурияга қарши санкцияларни юмшатишга қарор қилди. Бу ҳақида Euronews хабар бермоқда.

Унга кўра, юмшатиш энергетика ва транспорт соҳалари билан боғлиқ молиявий ва банк операцияларига, шунингдек, «гуманитар мақсадлар ва реконструкция қилишга» таъсир қилади. Беш ташкилот ҳам санкциялар рўйхатидан чиқариб ташланади: тўртта банк ва Syrian Airlines авиакомпанияси. Бундан ташқари, Сурияга ҳашаматли товарларни экспорт қилишни тақиқлаш бўйича истисно жорий этилади.

Блок санкцияларни тўхтатиб туриш мақсадга мувофиқ бўлиб қолиши учун мамлакатдаги вазиятни кузатиб боради. Европа Иттифоқи бош дипломати Кажа Каллас «агар ишлар нотўғри кетса, биз ҳам санкцияларни қайтарамиз», деб таъкидлади.

AFP хабар беришича, Сурия ташқи ишлар вазирлиги раҳбари Европа Иттифоқининг санкцияларни юмшатиш қарорини олқишлаган.

Аввалроқ, Европа Иттифоқи Россияга қарши 16-санкция пакетини тасдиқлагани ҳақида хабар берган эдик.