Илк бор маъмурий ҳуқуқбузарлик қилган тадбиркор жавобгарликдан озод қилинади

Президент Шавкат Мирзиёев кичик ва ўрта бизнес вакиллари билан учрашувда тадбиркорликка энди қадам қўйганлар учун «биринчи имконият» тамойили жорий этилишини маълум қилди. Бу ҳақда президент матбуот хизмати хабар бермоқда.

Давлат раҳбарининг таъкидлашича, илк бор маъмурий ҳуқуқбузарлик қилган тадбиркор жавобгарликдан озод қилинади ва камчиликни бартараф этиш учун имкониятга эга бўлади.

Янги иш бошлаган тадбиркорлар биринчи хатолик учун жавобгарликдан суғурталанган бўлади”, — деди президент.

У, шунингдек, янги тадбиркорларнинг «оёққа туриб олиши» учун уларни айниқса, фаолият бошлаган биринчи йилида қўллаб-қувватлаш жуда муҳимлигини қайд этди.

Маълумотларга кўра, охирги уч йилда мамлакатда 17,5 минг корхона ташкил этилган, бироқ улардан баъзилари бир йил ичида тугатилган. Йиғилишда Самарқанд, Қашқадарё, Хоразм ва Жиззах вилоятлари масъуллари янги корхоналар билан ишлашда сусткашлик қилаётгани таъкидланди.