Тошкентда «Бычок» лақабли шахс бошчилигидаги жиноий гуруҳ қўлга олинди

Тошкентда такси ҳайдовчиларидан пул ундириш билан шуғулланган жиноий гуруҳ фаолиятига чек қўйилди. Бу ҳақда ИИВ матбуот хизмати хабар берди.

Қайд этилишича, Тошкент вилоятида яшовчи фуқаро ҳуқуқни муҳофаза қилувчи органларга ариза билан мурожаат қилган.

Маълум бўлишича, ушбу шахслар пойтахт вилоятидан Тошкент шаҳрининг Яшнабод туманига йўловчи ташиш билан шуғулланган такси ҳайдовчиларига таҳдид қилган. Хусусан, улар ўзбошимчалик билан ойлик тўлов жорий этишган.

Шундан сўнг, ҳуқуқни муҳофаза қилувчи органлар томонидан 37 ёшли, Тошкент шаҳрида туғилган Ш. А. қўлга олинди. У «Бычок» лақаби билан танилган бўлиб, муқаддам Ўзбекистон Республикасининг Жиноят кодексининг 277-моддаси билан билан уч маротаба судланган.

Ҳабар қилинишича, у шериклари билан бирга Damas русумли автомашина ҳайдовчисини калтаклаб, ундан автомашина калитларини тортиб олган. Шунингдек, жиноий гуруҳ аъзолари мунтазам равишда ҳайдовчиларнинг йўналиш бўйлаб ҳаракатланишига тўсқинлик қилган ва жисмоний зўравонлик қўллаш билан таҳдид қилган.

Ушбу ҳолат юзасидан Ўзбекистон Республикаси Жиноят кодексининг 165-моддаси 2-қисми «в» банди (шахслар гуруҳи томонидан олдиндан тил бириктириб содир этилган товламачилик) билан жиноий иш қўзғатилди. Жиноий гуруҳ ҳаракатларидан жабр кўрган фуқаролардан ИИБга мурожаат қилиш ёки 102 рақамига қўнғироқ қилиш сўралди.