Тошкент вилоятида ош маркази ва дўкон ёниб кетди

Тошкент вилоятининг Қибрай туманида ош маркази ва дўкон ёниб кетди. Ҳолат ҳақида ФВВ батафсил маълумот берди.

Қайд қилинишича, 10 декабрь куни соат 03:49 да Тошкент вилояти ФВБга Қибрай тумани, «Ғафур Ғулом» МФЙ, Алишер Навоий кўчасида жойлашган масъулияти чекланган жамиятларнинг бирида (ош маркази) ёнғин содир бўлаётганлиги ҳақида хабар келиб тушган.

Хабарга асосан, 16 та ёнғин-қутқарув экипажи соат 03:54 да ҳодиса жойига етиб бориб, ёнғин соат 05:10 да ўраб олинган ва соат 05:50 тўлиқ ўчирилган.

Ҳодиса оқибатида тан жароҳати олган ва вафот этганлар йўқ. Ҳозирда ёнғиннинг келиб чиқиш сабаби бўйича суриштирув ишлари олиб борилмоқда.