Жанубий Европада туризмга қарши норозилик намойишлари бўлиб ўтди
15 июнь куни Испания ва Италиянинг сайёҳлар орасида машҳур бўлган шаҳарларида назоратсиз туризмга қарши намойишлар бўлиб ўтди. Бу ҳақда Reuters хабар берди.
Барселонада тахминан 600 нафар одам норозилик акциясида қатнашган. Намойишчилар «Сизнинг таътилингиз — менинг бахтсизлигим», «Оммавий туризм шаҳарни ўлдиряпти» ва «Уларнинг очкўзлиги бизни ҳалокатга олиб бормоқда» деган ёзувлар ёзилган плакатлар билан чиқишган.
Намойиш иштирокчилари сув пуркагичлардан фойдаланган, дўкон ва меҳмонхоналар ойналарига «Туристлар, уйингизга қайтинг!» деган стикерларни ёпиштиришган.
Қайд этилишича, 1,6 млн аҳолига эга Барселона ўтган йилда 26 млн туристни қабул қилган.
Шунингдек, Испаниянинг Малага, Пальма-де-Маллорка, Сан-Себастян, Гранада ва Ибиза оролларида ҳам, Италия шаҳарларидан Генуя, Палермо, Неапол, Милан ва Венецияда ҳам туризм оқимини камайтириш талаби билан норозиликлар ўтказилган.
Венецияда 1,5 минг нафар сайёҳни қабул қилишга мўлжалланган икки янги меҳмонхона қурилишининг олдини олиш истаги намойишчиларнинг асосий талаби бўлди.
Маълумотларга кўра, 2025 йилга келиб Европада халқаро саёҳатларга сарфланадиган харажатлар 11% га ўсиб, $838 млрдга(727 млрд евро) етиши кутилмоқда. Сайёҳлар сони бўйича рекорд кўрсаткични эса Франция ва Испания қайд этиши тахмин қилинмоқда.
