Одам савдосида айбланаётган ўзбекистонлик аёл Тошкентга экстрадиция қилинди
Одам савдоси жинояти учун халқаро қидирувда бўлган ўзбекистонлик аёл Туркиядан Ўзбекистонга экстрадиция қилинди. Бу ҳақда ИИВ матбуот хизмати хабар берди.
Қайд этилишича, аёл Интерпол каналлари орқали олиб борилган тезкор қидирув ва кузатув ишлари натижасида Истанбулда қўлга олинган. У узоқ вақт давомида Туркия ҳудудида яшириниб юрган.
Расмий маълумотларга кўра, аёл бир нечта қизларни юқори даромад ваъда қилиб, уларни Туркияга олиб борган. Борган жойида эса уларнинг паспортларини олиб қўйиб, фоҳишалик билан шуғулланишга мажбурлаган.
Жиноятчининг жойлашуви Ўзбекистон ва Туркия Интерпол Миллий марказий бюроларининг ҳамкорлиги натижасида аниқланган. Унга нисбатан Ўзбекистон Бош прокуратураси томонидан юборилган расмий илтимоснома Туркия томонидан қаноатлантирилган.
Шундан сўнг, аёл Интерполнинг Ўзбекистондаги ходимлари кузатувида Тошкентга олиб келинган ва унга нисбатан тергов ҳаракатлари бошланди.
