Жиноятда гумон қилинган шахсларга Ўзбекистондан чиқишда вақтинча чекловлар қойилади
Тегишли қонунга айрим шахсларнинг Ўзбекистондан чиқиш ҳуқуқи вақтинча чекланишини назарда тутувчи қўшимча ва ўзгартиришлар киритилмоқда.
Киритилган қўшимчаларга кўра, Ўзбекистондан чиқиш ҳуқуқини вақтинча чеклаш гумон қилинувчи, айбланувчи ёки судланувчига нисбатан қамоққа олиш эҳтиёт чораси қўлланилмаган, бироқ Ўзбекистондан чиқиб кетиб, суддан узрли сабабларсиз бўйин товлаши учун асослар мавжуд бўлганда қўлланилади, — дейилади хабарда.
Маълум бўлишича, прокурор, терговчи, суриштирувчи Ўзбекистондан чиқиш ҳуқуқини вақтинча чеклаш тўғрисида илтимоснома қўзғатиш ҳақида мазкур мажбурлов чорасини қўллаш асосларини баён этган ҳолда қарор чиқаради.
Илтимоснома материаллар келиб тушган пайтдан эътиборан 8 соатдан кечиктирмай ёпиқ суд мажлисида кўриб чиқилади.
Шундан сўнг, судья илтимосномани кўриб чиқиб, Ўзбекистондан чиқиш ҳуқуқини вақтинча чеклаш ёки уни рад этиш тўғрисида ажрим чиқаради.
Шу билан бирга, ажрим устидан 48 соат ичида шикоят берилиши ёхуд протест билдирилиши мумкин. Қонун расмий эълон қилинган кундан эътиборан кучга киради.
