АҚШда тиббий вертолёт ҳалокатга учради: 3 киши жароҳатланди
АҚШда тиббий вертолёт ҳалокатга учраб, тўғридан-тўғри Сакраментодаги йўлга қулаб тушди. Бу ҳақда маҳаллий ҳокимиятга таяниб CVS News хабар бермоқда.
Маҳаллий ҳокимиятнинг хабар беришича, REACH тиббий вертолёти, 59-чи кўча яқинидаги Шарқий 50-шоссе йўлига қулаб тушган.
Сакраменто шаҳар ёнғин хизмати капитанининг маълум қилишича, вертолёт бўртида 3 нафар экипаж аъзоси: учувчи, ҳамшира ва фельдшер бўлган. Уларнинг барчаси оғир тан жароҳатлари билан маҳаллий шифохоналарга етказилган.
Маълумотларга кўра, вертолёт беморни шифохонага етказгандан сўнг қайтиб кетаётган бўлган, шу пайт ҳавода фавқулодда ҳолат юз берган.
Шунингдек, ҳалокат содир бўлган жойда ҳеч қандай транспорт воситаси жабрланмагани маълум қилинди. Ҳозирча ҳалокат сабаблари тўлиқ аниқланмаган ва тергов ишлари давом этмоқда.
