Бухорода 3 та автомобиль иштирокида ЙТҲ содир бўлди

Бухоро вилояти Вобкент туманида 3 та автомобиль иштирокида йўл-транспорт ҳодисаси содир бўлди.

Маълум қилинишича, туман ҳудудидан ўтувчи халқаро аҳамиятга эга бўлган М-37 Самарқанд–Бухоро–Туркманбош автомобиль йўлининг 244-километрида «Nexia» ҳайдовчиси бошқарувни йўқотиб, ўзи билан бир йўналишда ҳаракатланиб кетаётган «Damas» орқасига бориб урилган. Бунинг оқибатида «Damas» кучли зарб билан дастлаб тўсиққа, кейин эса ундан кетиб ўтиб, қарама-қарши йўналишда кетаётган «Isuzu» юк автомобилининг олд қисмига урилган.

ЙТҲ оқибатида «Damas»даги йўловчи оғир тан жароҳатлари олиб, касалхонада вафот этган. Яна бир фуқаро эса касалхонада даволанмоқда.