Ўзбекистон яна 3 давлат билан ЖСТга аъзо бўлиш бўйича келишувга эришди
Ўзбекистон Аргентина, Австралия ва Гондурас билан Жаҳон савдо ташкилотига аъзо бўлиш масаласини келишиб олди. Бу ҳақда президентнинг ЖСТ бўйича вакили Азизбек Урунов маълум қилди.
Аниқланишича, шу ҳафта Женева шаҳрида юқорида қайд этилган давлатлар билан бозорга кириш бўйича икки томонлама протоколлар имзоланган.
Уруновнинг сўзларига кўра, бу Ўзбекистонни кўп томонлама савдо тизимига интеграциялашувида қўллаб-қувватлаш ва шериклик кучайиб бораётганидан ёрқин далолатдир.
Шунингдек, Ўрунов ЖСТнинг яна икки аъзоси билан принципиал келишувларга эришилганини маълум қилди.
Бугунги кунга келиб эришилган келишувлар сони 29 тага етди, яна икки давлат билан мустаҳкам келишувларга эришилди. Икки томонлама музокараларни тўлиқ якунлаш учун яна 3 давлат қолди.
