АҚШнинг иккита штатида фавқулодда ҳолат эълон қилинди
АҚШнинг Шимолий ва Жанубий Каролина штатларида кучли ўрмон ёнғинлари юзага келиб, минглаб аҳоли эвакуация қилинди. Бу ҳақида CBS News хабар берди.
2-март куни Шимолий Каролинанинг Полк округида ёнғин 400-500 акр ҳудудни қамраб олди. Ёнғин тез тарқалиши натижасида Трион ва Салуда шаҳарларидан минглаб одамлар кўчирилган. Бу ҳудудлар Ашвил шаҳридан тахминан 40 мил жанубда жойлашган.
Жанубий Каролинанинг Ҳорри округида эса ёнғин камида 1600 гектар майдонни ёқиб юборди. Губернатор Генри МакМастер фавқулодда ҳолат эълон қилиб, аҳолини эвакуация қилишга буйруқ берди. Маҳаллий аҳоли вакилларининг таъкидлашича, кучли шамол ёнғин тарқалишини янада кучайтирган.
Ёнғинни ўчириш учун икки самолёт, Blackhawk вертолёти ва махсус техникалар жалб қилинди. Куннинг иккинчи ярмида вазият назоратга олиниб, эвакуация қилинган аҳоли уйларига қайтишга рухсат берилди. Ушбу ёнғинлар минтақада фавқулодда чора-тадбирларни кучайтириш зарурлигини яна бир бор кўрсатди.
