Ўзбекистон АҚШда учта янги консуллик очишни режалаштирмоқда
Ўзбекистон АҚШда учта консуллик очишни ҳамда янги авиақатновларни йўлга қўйишни режалаштирмоқда, дея маълум қилди мамлакатнинг Қўшма Штатлардаги элчиси Фурқат Сидиқов.
17 январ куни элчилар ва тадбиркорлар иштирокида ўтказилган учрашувда Фурқат Сидиқов 2026 йилдан бошлаб Ўзбекистон АҚШ фуқаролари учун визасиз режим жорий этилишини маълум қилди. Унинг таъкидлашича, бу туристик соҳа учун янги имкониятларни очади.
Қайд этилишича, икки мамлакат ўртасидаги муносабатлар илк бор энг юқори даражага чиқган.
Президент қарорларига мувофиқ, сўнгги 30 йил давомида Ўзбекистоннинг Вашингтон шаҳрида элчихонаси ҳамда Нью-Йорк шаҳрида Бош консуллиги фаолият юритиб келган. Сўнгги президент қарорларига асосан эса Чикаго, Сан-Франциско шаҳарларида ва Вашингтон штатида яна учта янги Бош консуллик очиш режалаштирилмоқда, — дея таъкидлади Фурқат Сидиқов.
Фурқат Сидиқов янги Бош консулликлар очилиши Ўзбекистоннинг туристик салоҳиятини илгари суриш учун қўшимча имкониятлар яратишини таъкидлади.
Ўз навбатида, элчи Ўзбекистондан авиақатновлар ҳафтасига беш марта амалга оширилаётгани бу ҳам ўзига хос кўприк эканини, шу имкониятдан фаол фойдаланиш зарурлигини таъкидлади. Шунингдек, ҳозирда Флорида ёки Калифорния йўналишларига қўшимча рейслар очиш имконияти кўриб чиқилаётганини билдирилди.
