Ўрта Чирчиқдаги хонадонлардан бирида ёнғин оқибатида 4 киши вафот этди

Тошкент вилоятининг Ўрта Чирчиқ туманидаги хонадонда юз берган ёнғин оқибатида 4 киши вафот этди.

Ҳодиса ҳақида хабар 16 апрель куни соат тахминан 01:40 ларда Ўрта Чирчиқ тумани ИИБ навбатчилик қисмига келиб тушган. Унга кўра, «Ўртаовул» МФЙдаги уйда ёнғин хавфсизлиги қоидалари бузилиши натижасида чақнаш содир бўлган.

Оқибатда, ушбу хонадонда яшовчи 1996 йилда туғилган эркак, шунингдек унинг 2020 йилда туғилган ўғли, 2023 ва 2024 йилларда туғилган қизлари куйиш ҳамда ёнғиндан чиққан ис-газдан заҳарланиш натижасида тан жароҳатлари олиб, ҳодиса жойида вафот этган.

Шу билан бирга, эркакнинг 1999 йилда туғилган аёли ва 1972 йилда туғилган онаси ёнғин пайтида хонадон деразасидан сакраши натижасида турли хил тан жароҳатлари олган.