Тошкентда 1,2 млрд сўмдан ортиқ заргарлик буюмларини яширинча олиб ўтиш ҳолати тўхтатиб қолинди

Дубайдан учиб келган фуқаронинг юклари кўздан кечирилганда 140 дан ортиқ заргарлик буюми ва бир нечта олтин қуймалари борлиги аниқланди

Тошкент халқаро аэропортида қиймати 1,2 миллиард сўмдан ортиқ бўлган заргарлик буюмларини ноқонуний олиб ўтишга бўлган уриниш аниқланди, деб хабар бермоқда «Тошкент-АЭРО» ихтисослаштирилган божхона комплекси матбуот хизмати.

Таъкидланишича, «Дубай–Тошкент» йўналиши орқали Ўзбекистонга кириб келган фуқаронинг юклари божхона назоратидан ўтказилганда, декларацияда кўрсатилмаган заргарлик буюмлари ва олтин қуймалар аниқланган.

Хусусан, юклар орасидан соф оғирлиги 921,37 грамм бўлган 141 дона заргарлик буюмлари ҳамда 3 дона олтин қуймаси топилган.

Экспертиза натижаларига кўра, аниқланган заргарлик буюмлари ва олтин қуймаларнинг умумий қиймати 1 миллиард 293 миллион сўмни ташкил этган..

Бундан ташқари, фуқаронинг юклари орасидан 120 қути акциз маркалари бўлмаган тамаки ҳамда 90 дона никотинли снюс маҳсулотлари ҳам аниқланган.

Ҳозирда жиноят иши қўзғатилган, тергов ҳаракатлари олиб борилмоқда.