Навоийда фуқародан товламачилик йўли билан 1500 доллар олган аёл ушланди
Навоий шаҳрида 9 март куни фуқародан товламачилик йўли билан 1500 доллар олган аёл қўлга тушди.
Маълум қилинишича, 9 март куни фуқаро Н.Н. вилоят ИИБ бошлиғи номига ариза билан мурожаат қилган. Унда Д.Б. уни хизматга оид маълумотларини интернетда тарқатиш билан таҳдид қилиб, 4 март куни товламачилик йўли билан 3 миллион сўм пулларини олгани, шунга қарамасдан, ҳозирда яна 1500 доллар пул талаб қилиб келаётганини айтган.
Олиб борилган тезкор тадбирлар натижасида 9 март куни 23:36 да Навоий шаҳрида жойлашган кафеларнинг бирида Д.Б. фуқаро Н.Н.дан товламачилик йўли билан талаб қилган 1500 доллар пулларни олган вақтида қўлга тушган.
Шундан сўнг фуқаро ёнида бўлган аёллар сумкаси холислар ва ҳимоячи иштирокида кўздан кечирилганда унинг сумкасидан товламачилик йўли билан олган 15 дона 100 купюралик махсус кукун ёрдамида ишлов берилган жами 1500 доллар пул процессуал тартибда ҳужжатлаштириб олинган.
Ҳолат юзасидан вилоят ИИБ томонидан Д.Б.га нисбатан Жиноят кодексининг 165-моддаси (Товламачилик) 1-қисми билан жиноят иши қўзғатилиб, тергов ҳаракатлари олиб борилмоқда. Ҳозирда у тегишли тартибда ушланган.
