Наманганда хотинини рашк сабаб пичоқлаб ўлдирган эркак 13 йилга қамалди
Наманган вилояти Норин туманида шаръий никоҳдаги хотинини рашк сабаб пичоқлаб ўлдирган эркак 13 йилга озодликдан маҳрум қилинди.
Маълум қилинишича, судланувчи М.С. 2021 йил 23 июль куни соат 02:00 да аёли ишлайдиган туманнинг Яшик маҳалласи ҳудудида жойлашган чевархонага маст ҳолатда борган. Турмуш ўртоғига ишлаш мақсадида тонгда Тошкент шаҳрига ёки Андижон вилоятига кетишини айтиб, у билан бирга уйга боришни ва кетиш учун кийимларини тайёрлаб беришини сўраган. Аёл эса унга ўзи кетавериши, уйда онаси керакли кийимларини тайёрлаб, паспортини ҳам топиб беришини айтган.
Шундан сўнг М.С. турмуш ўртоғининг оиласига тегишли бўлган, Норин тумани Яшик МФЙда жойлашган уйга бориб, қайнонасидан унинг кийимларини тайёрлаб, паспортини топиб беришини сўраган. Қайнонаси ҳам унинг паспортини яшаш хонасидан топиб бера олмагач, турмуш ўртоғига қўнғироқ қилиб, ундан паспортини топиб беришни сўраган.
Марҳума М.Б. яшаш уйига бориб, ётоқхона шкафидан турмуш ўртоғи М.С.га тегишли бўлган паспортни топиб бериб, у билан жанжаллашиб, сўнгра яна чевархонасига қайтиб кетган. Бундан ғазабланган М.С. яшаш уйи ошхонасидан пичоқни олиб, турмуш ўртоғининг ортидан борган ва чевархонада у билан ўзаро жанжаллашган. Уни йигитлар билан телефонда гаплашиб юрганликда айблаган. Сўнг ўзи билан олиб чиққан ошхона пичоғи билан турмуш ўртоғи танасининг турли ерларига уриб, тан жароҳати етказган. Аёл тиббиёт бирлашмасига олиб борилган вақтда олган тан жароҳатлари туфайли вафот этган.
Суд хукмига кўра, судланувчи Жиноят кодексининг 97-моддаси (Қасддан одам ўлдириш) 1-қисмида назарда тутилган жиноятни содир этганликда айбли деб топилиб, унга 13 йил муддатга озодликдан маҳрум қилиш жазоси тайинланган.
