Алишер Усмоновдан Владимир Соловьёвгача: Италияда ЕИ санкциялари жорий этилган бойларнинг мулклари ҳибсга олинди
Италия молия гвардияси «РИА Новости» агентлигига Украинадаги воқеалар туфайли ЕИ санкциялари остида қолган россияликларнинг активлари ҳибсга олинганини тасдиқлади.
Маълум қилинишича, агентлик ихтиёридаги активлар рўйхатида деярли 140 миллион еврога баҳоланган мулклар мавжуд.
Келтирилишича, мулклар орасида Россия Давлат Думасининг собиқ депутати Олег Савченкога тегишли Тоскана провинциясидаги ХVII асрда қурилган вилла бор. Унинг нархи тахминан 3 миллион еврони ташкил қилади. Телебошловчи Владимир Соловьёв ҳам Комо кўлида жойлашган 8 миллион еврога баҳоланган мулкидан айрилган.
Сардинияда Алишер Усмоновнинг 17 миллион евролик кўчмас мулк мажмуаси қўлга олинган. Гвардия, шунингдек, Алексей Мордашов ва Геннадий Тимченконинг 2 та яхтаси ҳибсга олинганини тасдиқлади.
«Империя шаҳри портида ‘Северстал’ эгаси Мордашовнинг кемаси мусодара қилинди. ‘Lady M’нинг нархи 65 миллион еврога баҳоланмоқда. Сан-Ремодада эса ‘Volga Group’ инвестиция фонди асосчиси Геннадий Тимченкога тегишли 50 миллион евролик ‘Лена’ яхтаси ушланди», дейилади хабарда.
