Сурхондарёдан Мирзо Улуғбек ҳукмронлиги даврига оид мис тангалар топилди
Сурхондарё вилоятидаги Тўпаланг дарёси қирғоғидан Мирзо Улуғбек ҳукмронлиги даврига оид мис тангалар топилди.
Маълум қилинишича, Сариосиё туманидаги Алишер Навоий маҳалласида яшовчи фуқаролар Тўпаланг дарёси қирғоғидан жуда кўп мис тангалар топиб олгани ҳақида ОАВда маълумотлар тарқалган. Вазирлар Маҳкамасининг Маданий мерос инспекцияси раҳбарлигида ҳамда Маданий мерос агентлиги вакилларидан тузилган ишчи гуруҳ туманда олиб борган ўрганишлари натижасида бу маълумот тасдиқланди. Олимлар мазкур ашёлар ҳозиргача Ўзбекистон ҳудудидан топилган Мирзо Улуғбек ҳукмронлиги даврида зарб эттирилган пул тангаларининг энг катта ва яхши сақланган хазинаси эканини таъкидламоқда.
Шунингдек, Алишер Навоий маҳалласида яшовчи фуқаролар томонидан топилмалар талон-торож қилинаётгани аниқланган. Айни пайтда инспекция, агентлик ҳамда ҳуқуқни муҳофаза қилувчи органлар томонидан топилмалар аниқланган ҳудуд муҳофазага олинган. 9 мартдан бошлаб Сариосиё тумани Тўпаланг дарёси ҳудудида илмий изланишлар олиб борилади.
«Археология мероси объектларини муҳофаза қилиш ва улардан фойдаланиш тўғрисида»ги қонуннинг 16-моддасига кўра, археология ашёларини давлатга топшириш ҳамда фан, маданият ва таълим муассасаларига бириктириб қўйиш, очиқ варақ ва рухсатнома олган археолог археология ашёлари давлатга топширилишига қадар уларнинг бут сақланишини таъминлаши лозимлиги белгиланган.
«Фуқароларимиздан давлат мулкига эҳтиёткорона муносабатда бўлишларини ва топилмаларни ўрнатилган тартибда тегишли ташкилотларга топширишда фаолликларини сўраб қоламиз. Шу ўринда давлатга топширилган хазина ва моддий бойликлар учун мукофот белгиланганлиги алоҳида таъкидланади», дейилган хабарда.
