Фарғонада уйида қиморхона очган аёл ушланди

Фарғона вилояти Олтиариқ туманида уйида қиморхона очган аёл ушланди.

Маълум бўлишича, 27 январь куни туман ИИБ ТЭҚКГ ходимлари томонидан тезкор тадбир ўтказилган. Унда Жалаер МФЙ ҳудудида яшовчи Т.Д. исмли аёлнинг яшаш хонадони холислар иштирокида кўздан кечирилган. Аниқланишича, аёл уйида қимор ўйини ташкил этиб, 30 минг сўм эвазига ўйин учун шароит яратиб, фуқароларни жалб қилиб, уйни махсус жиҳозлаб олгани аниқланган. Шундан сўнг у далилий ашё билан ушланган.

Мазкур ҳолат юзасидан туман ИИБ ҳузуридаги тергов бўлими томонидан Т.Д.га нисбатан Жиноят кодексининг 278-моддаси 1-қисми (Қиморхона ташкил этиш) билан жиноят иши қўзғатилиб, тергов ҳаракатлари олиб борилмоқда.

Маълумот учун, Жиноят кодексининг 278-моддаси (Қимор ва таваккалчиликка асосланган бошқа ўйинларни ташкил этиш ҳамда ўтказиш)да кўрсатилган жиноятни содир этган шахс етти йилгача озодликдан маҳрум қилиш билан жазоланади.