Ўзбекистонда 2021 йилда хотин-қизлар томонидан қанча жиноят содир қилингани очиқланди

Сенатнинг ялпи мажлисида ички ишлар вазири 2021 йилда 10 минга яқин аёл жиноят содир этганини маълум қилди.

Маълум бўлишича, оғир турмуш шароитида яшаётган аёлларнинг муаммолари тўлиқ ҳал этилмасдан келинмоқда. Шу сабаб 2021 йилда 9759 нафар хотин-қиз томонидан 9053 та жиноят содир этилган.

Оила-турмуш муносабатлари доирасида тазйиққа учраган хотин-қизларнинг 39 343 нафарига ҳимоя ордери берилган. Оилалардаги нотинчлик, низоларнинг ўз вақтида ҳал этилмаслиги маҳалла фаоллари ва кенг жамоатчиликнинг эътиборидан четда қолиши оқибатида ўта оғир жиноятлар содир этилмоқда.

Жумладан, 2021 йилда қотиллик жиноятларининг ҳар учинчиси ёки 158 таси (37,1 фоизи), оғир тан жароҳати етказиш жиноятларининг 190 таси (14,4 фоизи) оилавий муаммолар туфайли содир этилган.