ТИВ ходими Фарғона вилояти ҳокими ўринбосари этиб тайинланди
Нуриддин Мамажонов Фарғона вилояти ҳокимининг ўринбосари – вилоят инвестициялар, саноат ва савдо бошқармаси бошлиғи этиб тайинланди.
Нуриддин Мамажонов 1982 йил 27 июлда Қувасой шаҳрида туғилган. Маълумоти олий. Жаҳон иқтисодиёти ва дипломатия университетини ҳамда Марказий Богема университетини (Прага) тамомлаган. Европа амалий фанлар ва менежмент институтида (Прага) Бизнес бошқарув доктори (ДБА) илмий даражасини олган.
Меҳнат фаолияти давомида Ташқи ишлар вазирлигида, Адлия вазирлигида турли масъул лавозимларда ишлаган. Ўзбекистоннинг Германиядаги элчихонасида, Франкфурт Майн шаҳридаги Бош консулхонасида фаолият олиб борган. 2022-2023 йилларда Ўзбекистоннинг Хитойдаги элчихонасида савдо-иқтисодий масалалар бўйича маслаҳатчи бўлган.
Нуриддин Мамажонов тайинловга қадар Ташқи ишлар вазирлиги Иқтисодий дипломатия ва маданий ҳамкорлик департаменти директорининг биринчи ўринбосари – Халқаро иқтисодий ташкилотлар ва халқаро молия институтлари билан ҳамкорлик бошқармаси бошлиғи лавозимида ишлаб келаётганди.
