Қибрайда далада яширинган 4 кг наркотикни олиб кетмоқчи бўлган талаба ушланди
Тошкент вилояти Қибрай туманида интернет тармоғи орқали синтетик наркотиклар савдоси билан шуғулланган жиноий гуруҳ аъзоси қўлга олинди. Бу ҳақда ДХХ матбуот хизмати хабар берди.
Хусусан, олдиндан кузатувга олинган, 2002 й.т. шахс ўзининг «Спарк» русумли автомашинасида наркогуруҳ ташкилотчилари томонидан берилган топшириққа кўра, Тошкент туманига бориб, муқаддам наркокуръерлар томонидан дала майдонидаги хуфия жойга яшириб қўйилган 4 кг 300 гр «альфа-ПВП» моддасини қабул қилиб олган вақтида ашёвий далиллар билан ушланди.
Мазкур шахс Тошкент шаҳридаги хусусий олий таълим муассасасининг 3-курс талабаси ҳисобланади.
Ҳолат юзасидан унга нисбатан Жиноят Кодексининг 25,273-моддаси 5-қисми билан жиноят иши қўзғатилиб, қамоқ эҳтиёт чораси қўлланилди.
Ҳозирда, тергов ҳаракатлари доирасида унинг жиноий шерикларини аниқлаш ва терговга жалб қилиш бўйича тегишли чора-тадбирлар амалга оширилмоқда.
