Фуқаролардан «Open Budget» овози эвазига мукофотлар ваъда қилиб, сўнг алдаб кетилмоқда

Ўзбекистон фуқаролари орасида «Ташаббусли бюджет» доирасида овоз бериш билан боғлиқ фирибгарлик ҳолатлари содир бўлмоқда. Бу ҳақда Ўзбекистон Иқтисодиёт ва молия вазирлиги хабар берди.

Вазирликнинг маълум қилишича, сўнгги вақтларда ижтимоий тармоқларда норасмий Telegram-ботлар орқали «Ташаббусли бюджет» жараёнларида овоз бериш эвазига пул мукофотлари таклиф этиш ҳолатлари кенг тарқалиб, турли баҳс ва мунозараларга сабаб бўлмоқда.

Ваъда қилинган маблағлар берилмаётгани бўйича фуқаролар томонидан Иқтисодиёт ва молия вазирлигига юзлаб мурожаатлар келиб тушмоқда, — дейилади хабарда.

Ушбу ҳолатда учинчи шахслар лойиҳаларга овоз тўплаш мақсадида пул маблағлари ёки моддий қийматиликлар ваъда қилган ҳолда фуқаролардан овоз тўплаб, кейинчалик мукофотларни бермаган.

Маълумот учун «Ташаббусли бюджет» жараёнларида овоз бериш фақатгина «Open Budget» тизимларида ишловчи мобил иловалари ҳамда Telegram расмий боти орқали амалга оширилади.

Шунингдек, берилган овозлар учун ҳеч қандай тўлов талаб этилмаслиги билан бир қаторда ҳеч қандай моддий рағбатлантиришлар ҳам назарда тутилмаган.

Эслатиб ўтамиз, овоз бериш жараёни 31-август куни соат 23:59 га қадар давом этади.