Янги Ўзбекистон кўчасидаги ерости автомобиль йўли очилди
Президент Шавкат Мирзиёев пойтахтдаги Янги Ўзбекистон кўчасида барпо этилган ерости автомобиль йўлини кўздан кечирди. Бу ҳақда давлат раҳбари матбуот хизмати хабар берди.
Хусусан, сўнгги йилларда Янги Ўзбекистон кўчасида истироҳат боғи, уй-жойлар, университет ва Олимпия шаҳарчаси қурилгани таъкидланди. Бу кўча келгусида Янги Тошкент шаҳрига олиб борувчи асосий йўллардан бири бўлади.
Янги Ўзбекистон кўчаси бўйлаб узунлиги 468, кенглиги 25 метр бўлган ерости автомобиль йўли барпо этилди. У соатига 10 мингдан зиёд автомобилни ўтказиш имкониятига эга, — деб маълум қилинди.
Туннелнинг усти яшил ҳудудга айлантирилиб, «Янги Ўзбекистон» боғи билан Олимпия шаҳарчаси ўртасида пиёдаларнинг хавфсиз ҳаракатланиши таъминланди.
Шунингдек, мазкур йўналишда лойиҳалаштирилган метро йўли учун туннел ва бекат ҳам қурилган. Янги Ўзбекистон кўчасида барпо этилган ерости автомобиль йўли машиналарнинг вақт сарфини 2 баробарга қисқартириб, кунига 1 тонна ёнилғи иқтисод қилинишига ва атмосферага чиқариладиган зарарли газлар миқдори 2 тоннага камайишига сабаб бўлиши хабар қилинди.
