Ўзбекистонда Аи-80 бензин нархи қанчага ошгани маълум бўлди
Ўзбекистонда ўтган ҳафта Аи-80 маркали автомобиль бензинининг ўртача бошланғич нархи бир тоннаси учун 5 миллион 294 минг 100 сўмдан 5 миллион 490 минг 100 сўмгача ошди.
Фото: «Tez News»
Таъкидланишича, ўтган ҳафтада биржа савдоларига 24 минг 338 тонна Аи-80 маркали автомобиль бензини қўйилган. Улардан 20 минг 273 тоннаси, яъни 83,3 фоизи сотилган. Ўтказилган савдоларда ҳар куни ўртача 52 харидор иштирок этган.
Кўриб чиқилаётган даврда Аи-80 маркали автомобиль бензинининг ўртача бошланғич нархлари бир тоннаси учун 5 миллион 294 минг 100 сўмдан 5 миллион 490 минг 100 сўмгача ёки 3,7 фоизга ўсган. Шу муносабат билан Аи-80 маркали автомобиль бензинининг ўртача кунлик нархи ҳам бир тонна учун 5 миллион 325 минг сўмдан 5 миллион 557 минг сўмгача ёки 4,4 фоизга кўтарилган.
Қайд этилишича, Аи-80 автомобиль бензинининг ўртача ҳафталик котировкаси 5 миллион 476 минг 800 сўмни, АИ-91 6 миллион 203 минг 900 сўмни ташкил этган.
Аввалроқ Ўзбекистонда 2020 йилнинг январь—сентябрь ойларида қанча бензин ишлаб чиқарилгани ҳақида хабар берилганди. Шунингдек, «UNG Petro» корхонаси автомобилларга ёқилғи қуйиш шохобчаларида импорт қилинадиган Аи-95 маркали бензиннинг бир литр нархи 300 сўмга арзонлаштиргани ҳақида хабар берилган.
