Грузияда мухолифат тарафдорлари такрорий сайловларни талаб қилиб норозилик уюштирди
Мухолифат тарафдорлари парламент сайловларини бекор қилишни талаб қилиб, Тбилисидаги Грузия парламенти биноси олдига тўпланди. Бу ҳақда «Рустави 2» хабар бермоқда.
Фото: Давид Мдзинаришвили / «ТАСС»
Хабарга кўра, «Руставели» проспектида бир неча минг киши йиғилиб, парламент сайлови натижаларига қарши норозилик билдирган. Митингда партияларнинг ёшлар қаноти вакиллари сўзга чиққан. Шунингдек, митингларда «Ватанпарварлар альянси» ва «Фуқаролар» партиясидан ташқари парламентга кирган деярли барча мухолифат партияларининг раҳбарлари иштирок этган.
Тбилисининг собиқ мэри, «Европа Грузияси» партияси етакчиларидан бири Гиги Угулаванинг сўзларига кўра, келаси якшанба, 8 ноябрь куни пойтахтда кенг юриш режалаштирилган. Мухолифат ҳам норозилик намойишлари ҳар куни бўлишини истисно қилмади.
«Интерфакс» хабарига кўра, митингда мухолифат раҳбарлари янги парламентга киришдан бош тортганликларини эълон қилди. «Грузия орзуси» раҳбари Мамука Мдинарадзе мухолифатни бойкот қилиш қонун чиқарувчи орган ваколатларини тан олишга тўсқинлик қилмайди, деб ҳисоблаган. Унинг таъкидлашича, конституцияга кўра, агар йиғилишда ишчи таркибнинг кўп қисми, яъни 76 депутат иштирок этса, парламент иш бошлаш ҳуқуқига эга. Шу билан бирга, Мдинарадзе «Грузия орзуси» парламентда 150 та депутатлик ўрнидан 90 дан ортиғига эга бўлишига ишонч билдирган.
Грузияда парламент сайловлари 31 октябрда бўлиб ўтди. Уларда 48 сиёсий партия ва етти сиёсий партияни ўз ичига олган иккита сайловолди блоклари иштирок этди. Марказий сайлов комиссияси маълумотларига кўра, ҳукмрон партияда 48 фоиздан сал кўпроқ бўлган ва собиқ президент Михаил Саакашвилининг партиясини ўз ичига олган мухолифатдаги «Бирликдаги куч» блоки 27 фоиз овоз олган.
Аввалроқ Беларусь шаҳарларида собиқ президентликка номзод Светлана Тихановская томонидан қўйилган ультиматум — ҳокимиятга қўйилган талабларнинг бажарилишининг сўнгги кунига бағишланган митинглар бўлиб ўтди. Кейинроқ Минск шаҳар полицияси бошлиғи Иван Кубраков митинг пайтида тахминан 120 киши ҳибсга олинганини маълум қилди.
