БМТ дунёда қанча одам қулликдан азият чекаётганини маълум қилди
Дунё бўйлаб 40 миллиондан ортиқ одам қулликдан азият чекмоқда, уларнинг 71 фоизини эса аёллар ташкил этади. Бу ҳақда БМТ Бош котиби Антониу Гутерриш 1 декабрь — Халқаро Қулликни тугатиш куни муносабати билан берган баёнотида маълум қилди.
Фото: «osce»
Хабарга кўра, БМТ Бош котиби Антониу Гутерриш дунё бўйлаб 40 миллиондан ортиқ одам қулликдан азият чекаётганини маълум қилиб, ташкилот ва барча фуқаролик жамиятларини қуллик қурбонларини ҳимоя қилишга ва қўллаб-қувватлашга ҳамда ушбу «жирканч одатлар»га қарши курашда уларнинг жамоавий ҳиссасини кучайтиришга чақирган.
«Бугунги кунда қуллик мажбурий меҳнат, мажбурий никоҳ, қарз мажбуриятлари, эксплуатация учун одам савдоси, шу жумладан, жинсий эксплуатация, болаларни қуролли тўқнашувларга жалб қилиш шаклидаги зулм шаклида намоён бўлмоқда», — дейди Гутерриш.
Шунингдек, АҚШ Сенати аъзолари 19 июнь — Қулликни бекор қилиш кунини миллий байрам деб тан олишни таклиф қилмоқда.
Аввалроқ дунёдаги турли динлар уламолари қулликни тугатиш масаласини муҳокама қилгани ҳақида маълумот берилган эди. Унга кўра, учрашув ташкилотчиси — Рим Папаси Франциск ўзининг якуний нутқида барча уламолар бир овоздан замонавий одам савдосини бутун инсоният учун зарарли деб билгани ва жойларда иллатнинг тугатилиши учун керакли тадбирлар амалга оширилиб, 2020 йилга қадар дунёда қулчилик тугатилиши учун ҳаракат қилинишини айтиб ўтган.
