Қорақалпоғистон аҳолисига Конституциядаги тегишли моддалар ўзгаришсиз қолдирилгани ҳақида хабар берилди

Қорақалпоғистонда рўйхатдан ўтган Ўзбекистон мобил операторлари абонентлари 2 июль куни тунда Конституциянинг 70−75-моддалари амалдаги таҳрирда қолиши ва ўзгармаслиги ҳақида SMS-хабарномани олди.

Қайд этилишича, ушбу маълумот нашрга Нукус шаҳри аҳолиси томонидан етказилган, мазкур хабар мобил алоқа операторлари вакиллари томонидан тасдиқланган.

Маълумотларга кўра, республикада интернетга кириш ҳали ҳам чекланган. Кўплаб аҳоли SMS’ни фақат эрталаб кўрганини хабар қилган.

Эслатиб ўтамиз, Нукус шаҳрида 1 июль куни бир гуруҳ шахслар Қорақалпоғистоннинг давлат бошқаруви органларини эгаллашга уринишда ифодаланган ғайриқонуний ҳаракатларни содир этганди. Жўқорғи Кенгес тартибсизликлар ташкилотчилари ҳокимият вакилларининг қонуний талабаларига бўйсунмай, республика фуқароларини маъмурий бинолар олдидаги майдонга йиғганини маълум қилганди.

Кейинчалик 2 июль куни Шавкат Мирзиёев Нукус шаҳрига етиб бориб, Жўқорғи Кенгес депутатлари, Қорақалпоғистон фахрийлари ва фаоллари билан учрашув ўтказганди. Конституцияга ўзгартириш ва қўшимчалар киритиш муҳокамаси ҳали давом этаётганини инобатга олиб ҳамда Қорақалпоғистон аҳолиси билдираётган фикр ва мулоҳазаларни ўрганган ҳолда Президент «Ўзбекистон Конституциясининг 70, 71, 72, 74, 75-моддаларини амалдаги таҳрирда ўзгаришсиз қолдириш зарур», — дея таъкидлаган.