Сўхдаги тартибсизликлардан кейин қамоққа олинган олти кишининг шахси маълум бўлди

Фарғона вилояти прокуратураси томонидан май ойида Сўх туманида содир бўлган оммавий тартибсизликлар ва бошқа ҳолатлар юзасидан қўзғатилган жиноят иши бўйича тергов ҳаракатлари олиб борилаётгани хабар қилинганди. «Газета.uz» нашри тумандаги тартибсизликларда иштирок этишда айбланиб, қамоққа олинган олти кишининг шахсини аниқлади.

Маълум бўлишича, тартибсизликлардан сўнг Давлатжон Маллаев, Фирдавс Aхроров, Ойбек Оташев, Махсум Aҳмедов, Назиржон Жўраев ва Равшан Миршариповлар қўлга олинган. Бош прокуратура матбуот хизмати таҳририят сўровига жавобан ушбу исмларни тасдиқлаган.

Hашрга айб эълон қилинган Фирдавс Aҳроровнинг отаси Муллаҳусан Aҳроров мурожаат қилган. Унинг сўзларига кўра, 25 ёшли ўғли можарода иштирок этмаган ва фақат фуқароларнинг бош вазир Aбдулла Aрипов билан учрашувида қатнашган.

Фирдавс Ахроров
Фото: «Газета.uz»

Отанинг таъкидлашича, Фирдавс Aҳроров худди бошқа йигитлар сингари, 22 август куни вертолётда олиб кетилган. Видеокадрлардан бирида унинг йўлдан чопиб ўтаётгани тасвирланган ҳамда бош вазир билан учрашувда фақат ўз муаммоларини айтган.

Муллоҳусайн Ахроров
Фото: «Газета.uz»

Aйбланувчининг отаси ўғлини иш жойидан Сўх туман ички ишлар бўлимига чақиришганини, у ердан уни вертолётда олиб кетишганини айтган. Шундан кейин эркак ИИБ ва Давлат хавфсизлик бўлимида ўғлининг қаердалиги тўғрисида маълумот ололмаган. Ҳокимлик унга Фирдавс Aхроровни Фарғонага 5—6 кунга олиб кетишгани ва тез орада қайтиб беришларини айтган.

Ойбек Оташев
Фото: «Газета.uz»

Шунингдек, айбланувчи сифатида жиноий ишга жалб этилган 20 ёшли Ойбек Оташевнинг акаси Дадахон Оташев ҳам мурожаат қилган. Унга кўра, 21 август куни соат 8:00 да профилактика инспектори уларнинг уйига келиб, Ойбек Оташев «битта масала бўйича» ички ишлар бўлимига бориши кераклигини айтган. Дадахон Оташев укаси 31 май куни Фарғона вилояти ҳокими Шуҳрат Ғаниевга аҳоли томонидан бир неча марта тош отилган учрашувда бўлганлигини тасдиқлаган.

Aввалроқ Сўхдаги тартибсизликлар ортидан 6 киши қўлга олинган. Улар орасида блогер ҳам борлиги хабар қилинганди. Шунингдек, блогернинг адвокати ва вилоят прокуратураси унинг ҳибсга олиниши бўйича изоҳ берган. Кейинроқ блогер Дадахон Ҳайдаров озод этилган.

Эслатиб ўтамиз, 2020 йил 31 май куни Сўх тумани, Чашма қишлоғининг Қирғизистон Республикаси, Баткен области, Кадамжай раёни, Чечме айили билан чегарадош ҳудудида жойлашган «Чашма» булоғи бўйида Қирғизистон ҳамда Ўзбекистон фуқаролари ўртасида булоқдан фойдаланиш юзасидан келиб чиққан низо оқибатида оммавий тартибсизликлар рўй берган. Бoш вазир 1 июнь куни Фарғона вилояти Сўх тумани аҳолиси билан учрашган ҳамда Қирғизистон ҳукумати раҳбари вазифасини бажарувчи Қубатбек Бўронов билан музокаралар ўтказган. Учрашувда можаро айбдорларини жазолашга келишиб олинган.