Ўзбекистонда коронавирусдан вафот этганларнинг 106 нафари 60-70 ёшли беморлар орасида қайд этилган
Ўзбекистонда коронавирусдан вафот этганларнинг 106 нафари 60-70 ёшли беморлар орасида қайд этилган. Бу ҳақда Соғлиқни сақлаш вазирлиги хабар берди.
Таъкидланишича, мамлакатда коронавирус қайд этилган беморларда ўлим кўрсаткичларининг аксариятига сурункали ва ҳамроҳ касалликларнинг мавжудлиги сабаб бўлмоқда.
Жумладан, 6 сентябрь ҳолатига кўра, COVID-19 инфекциясидан вафот этган 345 нафар беморнинг 132 нафарини аёллар, 213 нафарини эркаклар ташкил этган. Ўлимнинг ёш тоифасига кўра, 6 нафар беморни 30 ёшгача, 26 нафарини 30-40 ёш оралиғида, 45 нафарини 40-50 ёш оралиғида, 99 нафарини 50-60 ёш оралиғида, 106 нафарини 60-70 ёш, 63 нафарини эса 70 ёшдан катта беморлар ташкил этган.
Шунингдек, ўлим сабабига кўра, вафот этганларнинг 264 нафарида ўткир юрак-қон томир, нафас етишмовчилиги, 10 нафарида ўткир респиратор дистресс синдром, 8 нафарида тромбоэмболия, 4 нафарида ўткир миокард инфаркти ва бошқалар қайд этилган.
Бундан ташқари, коронавирусдан вафот этган беморларда касалликнинг кечиши таҳлил қилинганда, аксарият беморларда гиперкоагуляция — организмдаги барча томирларда қоннинг қуюлиб кетиши кузатилиб, у бемор аъзоларида тромбоз, инфаркт, инсульт каби асоратларга олиб келган.
Эслатиб ўтамиз, аввалроқ Ўзбекистонда 2 минг нафарга яқин 9 ёшгача бўлган болалар коронавирусга чалингани маълум қилинган. Бундан ташқари, ССВ дезинфекция туннеллари коронавирусга қарши фойдасиз чора эканини маълум қилган.
