Алексей Навальний Ўзбекистонда Пушкинни билишмайди, деб нотўғри гапирганини тан олди

Россиялик мухолифатчи Алексей Навальний заҳарланишни бошдан кечиргандан сўнг биринчи марта рафиқаси билан журналист Юрий Дудга катта интервью берди. Унда Коррупцияга қарши курашиш фонди асосчиси заҳарланиши ортида шахсан Путиннинг ўзи тургани, Россияга қайтишни ўйлётгани ҳақда гапирди ҳамда Ўзбекистонда одамлар Пушкин кимлигини билмайди, деб хато гапирганини тан олди.

Кадр: YouTube

Интервьюда Алексейнинг рафиқаси Юлия Навальная эри парвоз вақтида касалланиб, Омск касалхонасига тушганини эшитгач, уни Берлинга олиб кетишни истаганини маълум қилган. Унинг айтишича, немис шифокорлари Алексейни Омскдан Берлинга кўчириб ўтказиш мумкинлигини айтган бўлса ҳам, россиялик мутахассислар бунинг аксини айтган. Юлиянинг фикрича, унинг Путинга ёзган хати ва халқаро даражадаги мурожаатидан сўнг Россия расмийлари Алексейни қўйиб юбориши маъқул эканини тушунган.

Навальний интервью вақтида 2017 йил Ўзбекистонда Пушкинни ҳеч ким танимайди, деб иддао қилгани катта флешмобларга сабаб бўлгани ҳақида савол берилганида у хато қилганини тан олди.

«Бу мутлақо янглиш бўлган. Яъни ортиқча гап гапириб қўйиб, хато қилганман. Ўзбекистон катта давлат. Унда миллионлаб одамлар яшайди. Шубҳасиз, уларнинг анчаси Пушкинни танийди. Танимаганлари ҳам бордир. Ҳатто Россияда ҳам бор-ку ундайлар», — дейди Навальний интервьюда.

Маълумот учун, 2017 йилда россиялик мухолифатчи Алексей Навальний «Дождь» телеканалида Ксения Собчак билан суҳбатида ўзбекистонликлар Пушкинни танимасликларини иддао қилган эди. Бу эса ўз навбатида ўзбекистонликларнинг эътирозларини келтириб чиқарган. Ўзбекистонда яшовчи турли миллатлар вакиллари, каттаю кичик интернет орқали Навальнийнинг сўзларига видео орқали жавоб қайтара бошлагани ўзига хос флешмобга айланган.

Видеоёзув муаллифларидан бири Тошкент шаҳрида Пушкин кўчаси, Пушкин майдони, шоирга атаб қўйилган ҳайкал, унинг номи билан аталувчи метро бекати борлигини эслатиб ўтган. Шунингдек, кўплаб болалар Пушкиннинг машҳур шеърларини ёддан ўқиб берган, катта ёшлилар Навальний ва Собчакни Ўзбекистонга таклиф этган.

Алексей Навальний заҳарланиши мавзусига қайтиб, унинг организмига заҳар қандай тушганини ҳозирча ҳеч ким билмаслигини маълум қилган. Тахминларга кўра, заҳарланиш меҳмонхонада Навальний бутилкани ушлаганида содир бўлган. Бутилканинг юзасидан кейинчалик немис шифокорлар заҳар изларини топган.

«Мен меҳмонхонадан сув солинган бутилкани кўтариб, ҳайрон бўлганча чиққанимни-ку тушунамиз. Орадан уч ёки тўрт соат ўтди — узоқ вақт. Агар мен заҳарни ичганимда ёки еганимда ёки ҳидлаганимда, асфаласофилинга равона бўлган бўлардим».

Навальнийнинг фикрича, уни Омскдан дарров қўйиб юборишмаганининг сабаби заҳар организмга сингишини пойлашган. У Омск шифокорлари ичида касбининг фидойилари борлигини, аммо бош шифокор ўзининг сиёсий вазифасини бажаргани, уни қутқаришни истамагани ва ҳақиқатни сўзламаганини қўшиб қўйган. Сиёсатчи яна бир бор уни Путиннинг топшириғига кўра, Федераль хавфсизлик хизмати ёки ташқи разведка хизмати ходимлари заҳарлаганини айтган.

Навальний, шунингдек, Берлиндаги касалхонада унинг ёнига канцлер Меркель келгани кутилмаган ҳол бўлганини айтган.

«Унинг Россияда нималар бўлаётганини батафсил билиши ва ҳаммасини тушунаётгани мени лол қолдирди. Хабаровск ҳақида ҳам, Беларусь ҳақида ҳам. Ҳаммаси қандай уюштирилганини ҳам тушунади. Яна рус тилида гапиришни бошлаган», — дейди Навальний Меркель ҳақида.

Интервьюда Навальний Германияда яна икки ой қолиши мумкинлигини, лекин шифокорлар ҳали тўлиқ даволанишга қанча вақт кетишини билмаслигини айтган.

Аввалроқ Алексей Навальний Москвага парвоз пайти ҳушини йўқотгани, унинг чойи заҳарланган деб тахмин қилинаётгани хабар қилинган эди.