Telegram асосчиси Павел Дуров АҚШда йилнинг «асосий безориси» деб топилди
АҚШнинг «Politico» нашри йилнинг «асосий безорилари» рейтингини тузди. Унинг биринчи ўрнида тадбиркор ва Telegram асосчиси Павел Дуров қайд этилган.
Фото: Instagram/ @Durov
Материал муаллифлари Telegram асосчиси Дуровнинг мессенжерини «36 ёшли сирли яратувчиси ғояларини акс эттирувчи сўз эркинлигининг жаннати» деб атаган. Шунингдек, Telegram’га азалдан Европа ҳукуматлари томонидан террор фитналари ва ташвиқот воситаси сифатида қаралганини таъкидлаган.
«Facebook ва Twitter каби платформалар дезинформация ва зўравонликка қарши курашар экан, Telegram ушбу материалларнинг аксарияти учун жаннатга айланган», — дея хулоса қилган журналистлар.
Рўйхатга Дуровдан ташқари бошқа таниқли шахслар ҳам киритилган. Жумладан, Россия президенти Владимир Путин, Беларусь оппозицияси етакчиси Светлана Тихановская, америкалик журналистлар ҳамда инглиз ёзувчиси Ж.К.Роулинглар ҳам рўйхатдан жой олган.
Аввалроқ Дуров қандай қилиб саломатлик ва ёшликни сақлаб қолиш мумкинлигини ўзининг мисолида айтиб берган эди. Шунингдек, Павел коронавирус пандемиясидан кейин дунё цивилизацион силжишга дуч келиши мумкинлигини айтган.
