Фарғонада депутат сўровини жавобсиз қолдирган мансабдорга 446 минг сўм жарима тайинланди
Фарғона вилояти Олтиариқ тумани бандликка кўмаклашиш маркази директори депутат сўровини жавобсиз қолдиргани учун маъмурий жавобгарликка тортилди. Бу ҳақда ҳуқуқшунос ва блогер Зафарбек Солижонов ўзининг Telegram каналида хабар берди.
Фото: Зафарбек Солижонов Telegram канали
Маълум бўлишича, Олтиариқ туман кенгаши депутати Ўткирбек Отабоев «Обод қишлоқ» давлат дастурининг 2019 йилдаги ижроси юзасидан 2020 йилнинг 27 апрель куни туман бандликка кўмаклашиш маркази директори Камолиддин Қобиловга депутатлик сўрови юборган. Қобилов эса сўровни жавобсиз қолдирган. Шунинг учун депутат мансабдорни маъмурий судга берган. Июль ойининг ўрталарида суд бўлган.
Суд қарорига кўра, Камолиддин Қобилов маъмурий жавобгарлик тўғрисидаги кодекснинг 193-моддасида белгиланган ҳуқуқбузарликни (Депутатлик фаолиятининг кафолатларини бузиш) содир этган деб топилган. Унга 446 минг сўм жарима жазоси тайинланган.
Аввалроқ депутат Расул Кушербаев монополларни танқид қилгани ҳақда хабар берилган эди.
