Франция президенти Эммануэль Макрон коронавирусга чалинди

Франция президенти Эммануэль Макрон 17 декабрь, пайшанба куни коронавирус билан касалланди. Бу ҳақда Елисей саройи маълумотига таяниб, «РИА Новости» хабар берди.

Фото: «Mint»

«Бугун республика президентига COVID-19 ташхиси қўйилди», — дейилади хабарда.

Таъкидланишича, ташхис биринчи аломатлар бошланганда ўтказилган RTPCR тести асосида аниқланган. «Барчага тегишли амалдаги санитария қоидаларига мувофиқ республика президенти 7 кун давомида изоляция қилинади. У ўз ишини давом эттиради ва ўз фаолиятини масофадан туриб амалга оширади», дейилади баёнотда.

Қайд этилишича, Макроннинг турмуш ўртоғи — 67 ёшли Брижит Макрон ўзини ўзи изоляция қилган.

Маълумот учун, Францияда айни вақтда коронавирусга чалинганлар сони 2 миллион 409 062 кишига етган. Улардан 180 311 нафари касалликдан соғайган, 59 361 нафари вафот этган.