Наманганда 2020 йилда хотин-қизларнинг раҳбарликка тайинланиш кўрсаткичи салкам 50 фоизга кўпайди
Наманганда Сенатнинг Хотин-қизлар ва гендер тенглик масалалари қўмитаси томонидан «Хотин-қизлар ва эркаклар учун тенг ҳуқуқ ҳамда имкониятлар кафолатлари тўғрисида»ги қонуннинг муҳокамаси бўлиб ўтди. Бу ҳақда Сенат матбуот хизмати хабар берди.
![](https://teznews.uz/wp-content/uploads/2020/09/16egwe.jpg)
Фото: Сенат матбуот хизмати
Таъкидланишича, муҳокамада вилоятдаги аёлларнинг раҳбарлик лавозимига тайинланганлар кўрсаткичи ўтган йилга нисбатан 745 нафарга (47,1 фоиз) кўпайганлиги айтилган.
Мажлисда айтилишича, хотин-қизларнинг қарор қабул қилишдаги ўрнини кучайтириш, вилоятнинг бошқарув органларида аёллар сонини ошириш, тармоқларда кадрлар захирасини яратиш бўйича кўрсатмалар берилганди. Аммо муҳокама давомида Норин, Янгиқўрғон, Уйчи туманларида хотин-қизлар захираси ҳалигача белгиланган тартибда ташкил этилмаганлиги аниқланган.
Вилоятдаги жами 1 миллион 747 минг (55 фоиз) нафар меҳнатга лаёқатли аҳолининг 850,4 мингини (55 фоиз) хотин-қизлар ташкил қилади. Таҳлил натижаларига кўра, бошқарув тизимида ишлаётган хотин-қизлар 8,8 минг нафарни, техник ходим аёллар 56 минг нафарни ташкил қилиб, умумий банд ходимларга нисбатан ишловчи хотин-қизлар улуши 55 фоизни, шундан бошқарувда 33 фоизни ташкил қилади.
![](https://teznews.uz/wp-content/uploads/2020/09/178787484h4re44h.jpg)
Фото: Сенат матбуот хизмати
Вилоятда тадбиркорлик фаолиятини йўлга қўйиш истагида бўлган 5828 нафар хотин-қиз мавжуд бўлиб, мутасадди тузилмалар томонидан уларга ўз ишини йўлга қўйишда ёрдам кўрсатилмоқда. Шу билан бирга, 4140 нафар хотин-қиз ҳақ тўланадиган жамоат ишларига жалб этилган, 850 нафар хотин-қизга Бандликка кўмаклашиш давлат жамғармаси маблағлари ҳисобидан субсидиялар ажратилган, ўзини ўзи банд қилган 2 145 нафар хотин-қизга меҳнат дафтарчалари берилган.
Маълумот ўрнида, 2020 йилда 15 010 нафар фуқаронинг иш билан бандлиги таъминланиб, йўналишлар кесимида 8773 нафар хотин-қиз корхона, ташкилот ва муассасаларга доимий иш ўринларига жойлаштирилган. Январь-апрель ойлари давомида 752 нафар моддий ёрдамга муҳтож, 139 нафар ёлғиз, 276 нафар ногирон, 405 нафар тиббий ёрдамга муҳтож хотин-қизларга кўмак кўрсатилган.
Aввалроқ Олий Мажлис Сенатининг еттинчи ялпи мажлиси 11 сентябрь куни чақирилгани ҳақида хабар берилганди. Мажлисда Танзила Норбоева ёшлар орасида синтетик моддалар истеъмоли оммалашаётгани барчани ташвишлантириши кераклигини айтган.