Тошкент халқаро аэропортида 2 млрд сўмдан ортиқ заргарлик буюмларини ноқонуний олиб ўтмоқчи бўлганлар ушланди
Тошкент халқаро аэропортида йирик миқдордаги заргарлик буюмларининг ноқонуний айланмасига чек қўйилди, деб хабар бермоқда «Тошкент-АЭРО» ихтисослаштирилган божхона комплекси матбуот хизмати.
Хусусан, Тошкентдан Алматига учиб кетаётган фуқаро номига расмийлаштирилган йўл сумкаси рентген аппаратидан ўтказилганда, мазкур чемодан ичида унинг темир асосига ёпиштирилган, сариқ рангли металлдан ясалган лента кўринишидаги буюмлар борлиги аниқланиб, вақтинча сақловга олинади.
Маълум қилинишича, фуқаро ушбу чемоданни унга таниши берганини ва темирлар орасида сариқ рангли металлдан ясалган буюмлар борлигини билмаганини айтган. Буюмларнинг тахминий оғирлиги 350 граммни, қиймати эса 549 млн сўмни ташкил қилган.
Шунингдек, бошқа бир ҳолатда Истанбулдан учиб келган шахс контактсиз текширувдан ўтказиш қурилмаси ёрдамида текширилганда, унинг ички кийими ва икки оёғининг пайпоғига жойлаштирилган, йўловчи божхона декларациясида кўрсатилмаган, умумий оғирлиги тахминан 710 грамм бўлган заргарлик буюмлари борлиги аниқланган. Тилланинг тахминий қиймати эса 833 млн сўмга баҳоланган.
Бундан ташқари, Туркиядан келган яна бир фуқаронанинг текширув жараёнида шимининг чўнтаги ва пайпоқларига оғирлиги 803 грамм, қиймати 907 млн сўм бўлган заргарлик буюмларини яшириб олиб ўтмоқчи бўлгани маълум бўлган.
Ҳозирда юқоридаги барча ҳолатлар юзасидан Ўзбекистон Республикаси Жиноят кодексининг тегишли моддалари билан жиноят иши қўзғатилган.
