Санкт-Петербургда номаълум шахс ўзбекистонлик таксичини отиб ташлади
20 феврал куни Санкт-Петербург шимолидаги Парголово қишлоғидаги Виборг шоссесида ўзбекистонлик такси ҳайдовчисига киллер томонидан ҳужум қилинди. Россия Тергов қўмитаси қотилликка суиқасд моддаси бўйича жиноят ишини очди.
Қайд қилинишича, қотил қора рангли Toyota Camry машинасида болаларни 622-сонли гимназияга олиб келган 42 ёшли ўзбекистонлик таксичи Рустамбек Алдаевнинг бошига тўппончадан ўқ узган. Тергов қўмитаси эълон қилган кадрларда юзини қалпоқ остига яширган эркак ҳайдовчига яқинлашиб, бола ва ўткинчиларнинг кўз ўнгида унга ўқ узгани кўринади.
«Номаълум жиноятчи номаълум сабабларга кўра қотиллик мақсадида 42 ёшли эркакнинг бошига ўқотар қуролдан ўқ узган, шундан сўнг, воқеа жойидан қочиб кетган», дейилади қўмита хабарида.
Жабрланувчи шифохонага ётқизилган, ҳозир шифокорлар унинг ҳаёти учун курашмоқда, беморнинг аҳволи ўта оғир. Ҳозирча ҳужум сабаблари номаълумлигича қолмоқда.
