Андижонда 12 ёшли қизни зўрлашга уринган 52 ёшли эркак қамалди

Андижон вилоятида суд 12 ёшли қизчага зўравонлик қилмоқчи бўлган 52 ёшли Т.Э.га ҳукм чиқарди.

Nemolchi.uz хабарига кўра, жабрланувчининг онаси шу йилнинг июль ойида болаларни қўшнисига (судланувчининг қизи) қолдириб, опасининг тўйига борган. Қайтиб келганида, қўшнининг отаси (1971 йилда туғилган эркак) 12 ёшли қиз орқали жинсий эҳтиёжини зўрлик билан қондиришга уринаётганини кўрган.

Ўша куни маст ҳолатда бўлган судланувчининг сўзларига кўра, у ухлаб ётган қизнинг қўлидан телевизор пультини олмоқчи бўлган, бироқ унинг ҳаракати нотўғри талқин қилинган. Кейинчалик, тергов аниқлаганидек, масофадан бошқариш пульти ўша пайтда боладан уч метр узоқликда бўлган ва унинг бу гаплари исботланмаган.

15 декабрь куни Жиноят ишлари бўйича Избоскан туман суди ушбу шахсга нисбатан жиноят ишини кўриб чиқди.

У Жиноят кодексининг 25,119-моддаси 4-қисмида назарда тутилган жиноятни содир этганликда айбли деб топилиб, 15 йил муддатга озодликдан маҳрум қилинди.