Туркия 28 декабрдан мамлакатга кирувчилар учун янги қоидалар белгилади
Туркия ҳукумати 2020 йил 26 декабрда мамлакатда коронавирус инфекцияси тарқалишини чеклаш мақсадида қўшимча чораларни қабул қилди. Бу ҳақда Ташқи ишалар вазирлиги ахборот хизмати маълум қилди.
Фото: «МК-Туркия»
Маълумотларга кўра, Туркия ҳукумати мамлакатга келаётган барча шахслар учун янги қоидалар жорий қилган. Жумладан, 2020 йил 28 декабрдан бошлаб Туркияга авиа қатновлар орқали ва 30 декабрдан бошлаб эса қуруқлик ёки денгиз йўллари орқали кириб келувчи барча йўловчиларда мазкур мамлакатга киришдан 72 соатдан ошмаган вақт ичида топширилган ПЗР-тестнинг манфий жавоби бўлиши шарт.
Хабарда келтирилишича, Туркияга ҳаво транспорти орқали келувчи барча шахслар самолёт бортига чиқишдан олдин олинган тест натижасини тақдим қилишлари шарт. Акс ҳолда уларнинг мамлакатга киришига рухсат берилмаслиги маълум қилинган. Таъкидланишича, айнан ПЗР-тест натижаси талаб қилинмоқда, коронавирусга таҳлил ёки антитаначалар мавжудлиги тўғрисидаги бошқа маълумотномалар қабул қилинмайди.
Бундан ташқари, Туркия CОВИД-19 вирусининг янги штамми қайд этилган Буюк Британия, Дания, Италия, Германия ва Жанубий Африка Республикасига сўнгги ўн кун ичида сафар қилган сайёҳлар учун ўн кунлик карантинни ҳам жорий қилди. Изоляциянинг еттинчи куни олинган ПЗР-тест манфий натижа берган ҳолатда карантин муддатидан олдин тўхтатилиши мумкин. Маълумот ўрнида, Туркияда жорий қилинган ушбу чоралар 2021 йил 1 мартгача амал қилади.
Аввалроқ Ўзбекистон билан Туркия қурилиш мутахассислигига эга мигрантларни иш билан таъминлаш тўғрисида келишувга эришгани ва Туркияда бир кунда коронавирусдан рекорд даражада ўлим ҳолати қайд этилгани хабар қилинганди.
