Наманганда 7 ёшли қариндошини зўрлаганликда гумонланаётган шахс қўлга олинди

Наманган вилоятида етти ёшли қизчани зўрлаган 38 ёшли эркак қўлга олинди, деб хабар беради Kun.uz нашри.

Воқеа 14-октябр куни Янгиқўрғон туманида содир бўлган. Айбланувчи тоғасининг тўйига келиб, уй эгасининг етти ёшли неварасини алдаб, унга жинсий тажовуз қилган.

Қайд этилишича, эркак 2 кунлик қидирувдан сўнг ушланган. Жиноят ишлари бўйича Янгиқўрғон туман судининг 2025 йил 16 октябрдаги ажрими билан унга нисбатан қамоққа олиш тарзидаги эҳтиёт чораси қўлланган.

Шунингдек, маълум қилинишича мазкур эркак олдин ҳам номусга тегиш жинояти билан судланган. Жумладан, у ЖИБ Наманган туман судининг 2020 йил 26 февралдаги ҳукми билан Жиноят кодексининг 118-моддаси (номусга тегиш) 3-қисми «б» бандида назарда тутилган жиноятни содир этганликда айбдор деб топилган.

Натижада эркакка 10 йил 2 ой муддатга озодликдан маҳрум қилиш жазоси тайинланган. Бироқ ЖИБ Чирчиқ шаҳар судининг 2025 йил 19 февралдаги ажрими билан эркакнинг ўталмаган 5 йил 1 кун озодликдан маҳрум қилиш жазоси шу муддатга ахлоқ тузатиш ишлари жазосига алмаштирилган.