Ўзбекистонда абитуриентларга рухсатномалар бериш бошланди
Абитуриентлар тест синовига паспорт (ID-карта) ва абитуриент рухсатномаси билан келишлари лозим
Ўзбекистонда 2026-2027-ўқув йилида олий ва касбий таълим муассасаларига ўқишга кириш учун онлайн рўйхатдан ўтган абитуриентларга рухсатномалар бериш бошланди, деб хабар бермоқда Билим ва малакаларни баҳолаш агентлиги матбуот хизмати.
Абитуриентлар тест синовларида иштирок этиш учун «Абитуриент рухсатномаси»ни my.uzbmb.uz сайтидан шахсий идентификация рақами ҳамда паспорт серияси ва рақамини киритган ҳолда юклаб олишлари мумкин.
Абитуриентлар тест синовига паспорт (ID-карта) ва абитуриент рухсатномаси билан белгиланган вақтдан кечикмаган ҳолда келишлари лозим.
Паспорт нусхаси ёки бошқа ҳужжатлар билан келган, шунингдек, кечикиб келган абитуриентлар тест синовларига киритилмаслиги таъкидланди.
