Ҳиндистонда Air India самолёти қўнгач ёниб кетди

Air India авиакомпаниясига тегишли Airbus A321 самолёти Индира Ганди номидаги халқаро аэропортга қўнганидан сўнг ёниб кетди. Бу ҳақда авиакомпания баёнотига таяниб Reuters хабар берди.

Маълумотларга кўра, самолёт Гонконгдан Нью-Деҳлига парвоз қилган. Йўловчилар тушаётган вақтда ҳаво кемасининг электр генератори ёнган ва автоматик тарзда ўчган. Ҳодисада барча йўловчилар ва экипаж аъзолари хавфсиз эвакуация қилинган.

Air India самолёт «бироз зарар кўрган»ини маълум қилган. Лайнер ҳозирда техник текширув ўтказиш учун фойдаланишдан чиқарилган. Авиакомпания воқеа ҳақида авиация маъмуриятини хабардор қилган.

Эслатиб ўтамиз, июнь ойида Air India’нинг Аҳмадободдан Лондонга йўл олган Boeing 787-8 Dreamliner самолёти ҳавога кўтарилгач қулаб тушган эди. Бортдаги 230 йўловчи ва 12 нафар экипаж аъзоси билан бирга, самолёт қулаган ҳудудда яшовчи фуқаролар ҳам ҳалок бўлган.