Аҳмадободдаги авиаҳалокатда 100 дан ортиқ киши ҳалок бўлгани маълум қилинди
Аҳмадободдаги авиаҳалокат оқибатида камида 100 нафардан ортиқ йўловчи ҳалок бўлди. Бу ҳақда расмийларга таяниб Reuters хабар берди.
Қайд қилинишича, самолётда жами 242 киши — 217 нафар катталар, 11 нафар бола ва 2 нафар чақалоқ бўлган.
Аир Индиа маълумотига кўра, ҳалок бўлганлар орасида асосан Ҳиндистон ва Британия фуқаролари бор. Қулаган самолёт Boeing 787-8 Dreamliner бўлиб, бу турдаги самолётлар учун илк ҳалокатли авиафалокат бўлиб қайд этилди.
Политсиянинг билдиришича, самолёт Б.Ж. тиббиёт коллежининг давлатга қарашли ётоқхонасига қулаб тушган. Бинонинг ошхона қисми тўлиқ вайрон бўлган. Айни пайтда 100 дан ортиқ куйган жасадлар касалхонага суд-тиббий экспертиза учун олиб келинган, ётоқхонадаги қутқарув ишларининг 70–80% и бажарилган.
Воқеа жойига кўплаб қутқарув экипажлари жалб этилган. Жароҳат олганлар шаҳар касалхоналарига етказилмоқда. Air India вакиллари воқеа юзасидан тергов олиб борилаётганини ва қўшимча маълумотлар расмий саҳифалар орқали эълон қилинишини билдирган.
Ҳозирча ҳалокатга нима сабаб бўлгани номаълум.
Шунингдек, воқеа юзасидан Ўзбекистон президенти Шавкат Мирзиёев воқеа муносабати билан Ҳиндистон президенти Драупади Мурму ва Бош вазири Нарендра Модига таъзия мактуби йўллади.
